5 Ben-Hadad mi tirhai chu an hung nawk a, a kuomah, “Hi hi Ben-Hadad thu chu a nih: ‘I tangkaruo le rangkachakhai le i nuhmeihai le nauhai ka lakpek ding che thuah mi ka hung tir ta a. 6 Amiruokchu, zingah hieng tik hun vela hin i in le lo le i thoktuhai in le lo po po dap dingin ka thoktuhai ka hung tir ding a nih. In rohlu po po lâng an ta, tol hmang an tih’ a ti a nih” tiin an hril a.

7 Israel lal chun a rama upahai po po chu a ko khawm a, an kuomah, “En ta u, hi mi hin thil thra naw thaw a hang tum nasat dan hi! Ka nuhmeihai le nauhai le ka tangkaruohai le rangkachakhai a hung ngèn khan ka lo sèl khom a ni bok si naw a” a ta. 8 Upahai le mipui po po chun, “Lo ûksak naw la, a thil ngiethai chu lo remtipui bok naw rawh” an ta.

9 Ben-Hadad mi tirhai kuoma chun, “Ka lalpa, lal kuoma chun hieng ang hin hril ro: ‘I thil ngiet hmasa po kha chu i siehlaw hin thaw ngei a ta, tuta i hung ngiet ruok hi chu thaw thei naw nih’ tiin” a ta. A donna chu hawnin Ben-Hadad kuomah an kir nawk a.

10 Ben-Hadad chun Ahab kuomah “Vei khat peia ka mihai kuoma sem ding Samaria-a hin pilvut ka hlâ vai chun, pathienhaiin an law law mi law hai sien, chuong nèka nasa khom chun mi thaw raw hai se” tiin mi a tir nawk a. 11 Israel lal chun, “‘Ralthuoma inthuom lai chu ralthuom hlîp tah angin uongthuong ngai a ni nawh’ tiin hung hril ro” a ta.

12 Ama le lalhaiin riebuka zu an dawn laiin chu thu chu Ben-Hadad chun a lo hriet a, a mihai kuoma chun, “Insiem ro leh” a ta, khawpui chu bei dingin an insiem ta a.

13 Chuong lai chun Israel lal Ahab kuoma chun zawlnei a hung a, a kuomah, “Hieng hin LALPAN a hril: ‘Sipaihai zozai saw i hmu am? Voisun hin sawnghai saw i kutah ka pêk ding a nih, chuongchun, LALPA chu ka nih ti hre ta’ng i tih’ tiin” a ta. 14 Ahab chun, “Tu hmangin am?” a ta. Zawlnei chun, “‘Biel tin optuhai rongbawltu tleirawl ruol hmangin’ ti hi LALPA thu suok chu a nih” a ta. Lal chun, “Tuin am a bei hmasa ding?” a ta. Zawlnei chun, “Nangin” a ta.

15 Ahab chun biel tin optuhai hnuoia thok tlangval huoisenhai chu a ko khawm a, an rêngin zahni le sawmthum le pahni an nih. Chu zoah Israel thlahai po po chu a khawm a, an rêngin sangsari an nih. 16 Sunchang lai an inthok suok a, Ben-Hadad le a thrangpuitu lal sawmthum le pahnihai chu an riebukah zu an lo dawn inrui a. 17 Biel optu hnuoia thok tlangvalhai chun hma an tawn a, hma lawk dinga Ben-Hadad mi tirhai chun an lo hmu a, “Samaria-a inthokin mi an hung suok” tiin an hril a. 18 Ama chun, “Inrem nuoma hung an ni leh a hringin lo man unla, indo dinga hung an ni leh a hringin lo man bok ro” a ta.

19 Biel optuhai inrawi tlangvalhai chun an hung bei a, an hnungah sipai nawlpui chun an zui a. 20 Mi tinin an bitum seng chu an that a, chuongchun Aram mihai chu an tlansie a, Israelhai chun an hnot a. Aram lal Ben-Hadad ruok chu sakor chungah chuongin, sakor chung chuong mi iemani zat leh a tlan suok a. 21 Israelhai lal chun hma a nor pei a, sakorhai le tawlailirhai chu an bei a, Aram mi tam tak an that a.

22 Chu hnunga chun Israel lal kuoma chun zawlnei a hung a, a kuomah, “Kum nawk thrâl hunah Aram lalin a hung do nawk ding che a ni leiin in ngirhmun sukhrat unla, thaw trûlhai chu thaw ngei ro” a ta. 23 Aram lal hotuhai chun lal kuomah, “An pathienhai chu tlangram pathien an ni leiin eini nêkin an hrât lem a nih. Phaizawlah inbeipui inla, mi ngam naw ni hai. 24 Chun, hi hi thaw ngei rawh: lalhai hi an rêngin thlak vong la, anni hmunah ram optuhai sie la, 25 sipaihai sakor le tawlailir i chăn zât char kha indin thar nawk la, phaizawlah inbeipui ei ta, anni nek chun hrât lem ngei ei tih” an ta. An thu chu a pom a, an ti ang tak chun a thaw a.

26 A kum nawk thrâlah Ben-Hadad chun Aram mihai chu a khawm a, Israelhai do dingin Afek chen a hang tlung a. 27 Israel thlahai khom an pung khawm a, fak ding an sek khawm a, lo bei dingin an inthok a. Anni rawi epa chun Israelhai chu kèl hon tlawm te, hon hni zat ang chauh hi an inkul a, Aram sipaihai ruok chu a ram phêkin an inzar a.

28 Chun, Pathien mi a hung a, Israel lal kuoma chun, “LALPA chun hieng hin a hril: ‘Aram mihaiin LALPA hi phaizawl pathien ni loa tlangram pathien ni dinga an ngai leiin, hieng zozai sipaihai hi i kutah pêng ka ta, kei hi LALPA chu ka nih ti hung hrieng i tih’ tiin” a ta.

29 Ni sari sung chu an inep tuo a, a ni sari ni chun an inbei ta a, Israel thlahai chun Aram mihai chu ni khat thilthuah nuoi khat an that a. 30 That bânghai ruok chu Afek khaw sungah an tlàn lût a, mi singhni le sangsari chu kul chimin a del hlum a. Ben-Hadad chu khawpui sunga chun a tlan lut a, pindan rilah a’n bi a. 31 A rawihai chun a kuomah, “Ngai ta, Israel sungkuoa lalhai hi zangai thei tak mi an nih ti kan hriet a. Saiip dierkeiin, hruola rîng khitin Israel lal kuoma va feng ei ta, ei hringna a hlà nuom el rawi mawh” an ta. 32 Saiip dierkei a, rîngah hruol bâtin Israel lal kuoma chun an fe a, a kuomah, “I siehlaw Ben-Hadadin, ‘Lunginsiet takin mi hlà hrâm raw se’ a tih” an ta. Ama chun, “A la dam a ni maw? Ka unaupa annawm” a ta.

33 Chuong mihai chun ngai thra takin, a lungril taka a hril sawnin, “Ni e, i unaupa Ben-Hadad ni e” an ta. Ama chun, “Va fe unla, hung thruoi ro” a ta. Ben-Hadad chu a hung suok a, a kuomah a hung a, tawlailirah a lo inchuongtir a. 34 Ben-Hadad chun a kuomah, “Ka pain i pa laka inthoka khuo a lo lakhai kha pe kîr nawk vong ka ti che a; ka pain Samaria-a dawrpui hmun a siem ang bok khan nang khomin Damaska khawpuiah dawrpui hmun i siem ve ding annawm” a ta. Ahab chun, “Chuong anga thu i thlung chun infetir ka ti che” a ta. Chuong ang chun a kuomah thu a thlung a, a’n fetir ta a.

35 Chun, zawlnei naupahai laia pakhat hin LALPA thuin a ruolpa kuomah, “Mi hang vaw raw khai” a ta, sienkhom a vuok nuom naw a. 36 Zawlnei chun a kuomah, “LALPA thu i awi naw leiin i mi liemsan charin sakeibakneiin lo sèng a ti che” a ta. A fe suok charin sakeibaknei a’n tuokpui a, a lo se hlum ta a.

37 Zawlnei chun mi dang a hmu a, a kuomah, “Lunginsiet takin mi hang vaw ta leh” a ta, mi chun a vuok a, a vuok sil ta a. 38 Zawlnei chu a fe a, lampuia chun lal a lo inchàn a, a mit chauh inlangin hmai a tuom a. 39 Lal a hung tlung chun a lo ko a, “I siehlaw hi indona rûnpui hmunah a fe a, mi pakhat hi a râl man thruoiin a hung a, ka kuomah, “Hi mi hi lo veng rawh, a tlan hmang hlauh chun a hringna aiah i hringna chân i ta, chuong a ni naw chun tangkaruo sangthum chawi i tih’ a ta. 40 I siehlaw hi a khing khinga ka buoi vel sungin a lo bo ta dai a” a ta. Israel lal chun, “I chungthu chu nangin i rêl zo der tah annawm” a ta.

41 Chu phing leh zawlnei chun a hmai tuomna chu a hawk a, lal chun zawlneihai laia mi a nih ti a hriet ta a. 42 Zawlnei chun lal kuomah, “LALPAN hieng ang hin a tih:’Thi ngei dinga ka ti ta sa chu i’n suoktir leiin a hringna aiah i hringna, a mihai aiah i mihai chân i tih” a ta. 43 Hmai thûm le lungdongin, Israel lal chun Samaria-a a lal in tieng a pan ta a.