5 Hagit laka Davida naupa Adonija chun, “Kei hi lala um ding tak chu ka nih” a ta, a hmang dingin tawlailir le sakorhai a buotsai a, a hmaa tlântu ding mi sawmnga a ruot bok a. 6 A pa chun, “Ieng leia hieng thil hi i thaw am a na?” tiin a lo inrol chuong nawh. Ama chu Absalom sang, a dottu char, tlangval hmêl thra tak a nih. 7 Adonija chun Zeruia naupa Joab le thiempu Abiathar hai chu a răwn a, ama tieng an thrang a. 8 Thiempu Zadok hai, Jehoiada naupa Benaia hai, zawlnei Nathan hai, Simei hai, Reia hai le Davida vengtu mi huoisenhai ruok chun Adonija chu an zui nuom ve nawh.

9 Adonija chun beram le bawng, a ran chawm thauhai chu En Rogel bula um Zohelet lungpuia chun a that a, hlănbiek a thaw a, chu taka chun lal nau, a unauhai po po le Judai rama lal khawnbawlhai po po chu a fiel khawm a, 10 sienkhom zawlnei Nathan hai, Benaia hai, lal vengtu mi huoisenhai le a unaupa Solomon hai ruok chu a fiel ve nawh.

11 Zawlnei Nathan chun Solomon nu Bathseba kuomah, “Ei pu Davida hriet loin Hagit naupa Adonija chu lalin a um tah ti i lo hriet ve am? 12 Tu hin nangma him dan ding le i naupa Solomon him thei dan ding chu hril ka ti che. 13 Lal kuomah lut la, a kuomah, ‘Aw lalpa, ka pu, i naupa Solomon hi i hnunga lal hung ni ngei ding le i lalthrungpha hung hluo ngei dingin i bawinu kuomah inkhâm meuin thu i tiem tah a ni naw am a ni? Iem a ta tu hin Adonija chu lalah a um el ta hi?’ va ti rawh. 14 Lal i biek lai zingin kei khom hung lut veng ka ta, i thu hril chu hung namnghet ka tih” a ta.

15 Bathseba chu lal pindana chun a va lut a, lal chu a lo tar kuong el ta a, Sunam nunghak Abishag chun a rong a lo bawl a. 16 Bathseba chun dingthrathruonin lal chu chibai a bûk a, lal chun, “Ieng am i dit a?” a ta. 17 Ama chun, “Ka lalpa, nangma ngeiin i siehlaw kuoma hin LALPA i Pathien hming sâlin, ‘I naupa Solomon chu ka hnungah lal hung ni’ng a ta, ka lalthrungpha hung hluong a tih’ tiin inkhâm meuin thu i tiem a. 18 Ngai ta, tu hlak hin Adonija chu lalah a hung um ta a, chu chu ka pu, ka lalpa hin i la hriet si nawh. 19 Ran tam tak, bawng le beram thâu tak tak inhlănin, lal naupahai po po le thiempu Abiathar le i sipai kawmandar Joab hai a fiel a, i siehlaw Solomon ruok chu a fiel sa ve nawh. 20 Ka pu, ka lalpa hnunga hin lalthrungphaah tu am hung inthrung a ta ti i puong ding chu Israelhaiin an nghak thrup el a nih. 21 Chuong naw chun hieng hi hung ni’ng a ta, ka lalpa hi a pi le puhai kuoma a chawl ve pha chun, kei le ka naupa Solomon hi thil suol thawtuah an mi ngai el ding a nih” a ta.

22 Chuonga lal a biek lai zing chun zawlnei Nathan chu a hung lŭt a. 23 “En ta, zawlnei Nathan khom a hung ve ie” tiin lal chu an hril a. Lal kuom a va tlung chun lal chu bokkhupin chibai a bûk a. 24 Nathan chun, “Aw lalpa, ka pu, ‘Ka hnungah Adonija hi lalin inthrung a tih i ti am a ni? 25 Voisun hin a fe thla a, ran thau thau, beram le bawng tuoi a that treu a, lal naupahai po po, sipai lalhai le thiempu Abiathar hai a fiel a, fain an dawn tlàng a, ‘Pathienin Adonija huolhim raw se’ an ti a nih. 26 Amiruokchu, i siehlaw ngei ngei kei le thiempu Zadok hai, Jehoiada naupa Benaia hai le i siehlaw Solomon hai ruok chu a mi fiel ve nawh. 27 Hi hi lalpa ka pu thua a thaw a ni si chun lalpa ka pu hin a hnunga lalthrungphaa inthrung ding chu a tû tak hi’m a na ti i siehlawhai hi a lo hril ve naw a ni maw?” a ta.

28 Chu phing leh lal Davida chun, “Bathseba kha hung ko lut ro” a ta. A hung lut a, lal hmaa chun a ngîr a. 29 Lal chun, “Buoina po poa inthoka ka hringna san suoktu LALPA hring zing hmingin ka hril a, 30 LALPA Israelhai Pathien hming sâla, ‘I naupa Solomon hi ka hnungah lal la ni ngei a ta, ka hmunah lalthrungphaa hin la thrung a tih’ tia thu ka’n khàm ang khan voisun ngei hin ka hlen suok ding a nih” a ta. 31 Bathseba chun bokkhupin lal chu chibai a bûk a, “Ka pu le ka lal Davida hi kumkhuoin dam zing raw se” a ta.

32 Lal Davida chun, “Thiempu Zadok le zawlnei Nathan le Jehoiada naupa Benaia hai kha hung ko lut ro” a ta, a hmaa chun an va fe a. 33 Lal chun an kuomah, “In pu khawnbawlhai thruoi unla, ka naupa Solomon hi ka sabengtung chunga ngei inchuongtir unla, Gihon-ah zu fepui ro. 34 Chu taka chun thiempu Zadok le zawlnei Nathan haiin Israelhai lal dingin hriek năl hai sien la; chun, tawtawrawt mût unla, ‘Lal Solomon dam sawt raw se’ tiin khêk ro. 35 Ama chu hung zui tung inla, ka lalthrungphaa hin hung inthrungtir inla, ka âiin ro rêl raw se. Israelhai le Judahai chunga rorêltu dingin ka ruot a nih” a ta.

36 Jehoiada naupa Benaia chun, “Amen! Ka pu, ka lalpa thu chu LALPA a Pathien khomin pom ngei raw se. 37 LALPA chu ka pu, ka lalpa kuomah a um hlak ang bokin Solomon kuoma khom um sien la, ka pu, lal Davida lalthrungpha nêka ropui lemin a lalthrungpha chu siem raw se” a ta.

38 Chuongchun, thiempu Zadok hai, zawlnei Nathan hai, Jehoiada naupa Benaia hai, Keret mihai le Pelet mihai chun Solomon chu Davida sabengtunga inchuongtirin, Gihon-a chun an thruoi thlak a. 39 Thiempu Zadok chun Hmun Thienghlim puon ina mi hriek siena fungki a hung chawi chu a lâk suok a, Solomon chu hriek a năl a. Tawtawrawt an mût a, mi po po chun, “Lal Solomon dam sawt raw se” tiin an khĕk a. 40 Mipuihai chun ama chu an zui tung a, nasa taka lawmin theihlehai an mŭt a, an ri chun hnuoi a nghor nghing a.

41 Adonija le a mi fielhaiin ruoi an kil zo tawm chun ri an hriet a. Joab-in tawtawrawt ri a hriet chun, “Khawpui sunga ri so veng vung chu iem an ta leh?” ta. 42 A hril lai zingin thiempu Abiathar naupa Jonathan chu a hung tlung a. Adonija chun, “E khai, hung lut rawh. Nang ang mi fel chun chanchin lawmum hung hăwn ngei i tih” a ta. 43 Jonathan chun, “Ka hăwn naw top el. Ei pu, lal Davidan lalah Solomon a sie tah annawm. 44 Solomon zui dingin thiempu Zadok hai, zawlnei Nathan hai, Jehoiada naupa Benaia hai, Keret mihai leh Pelet mihai chu a tir a, lal sabengtung chungah an inchuongtir a, 45 thiempu Zadok le zawlnei Nathanin Gihon hmunah lal dingin hriek an năl a, chu taka inthok chun hlim takin an hung kir a, an hlim ri chun khawpui a thangkhâwk a, chu ri chu a nih in ri hriet chu. 46 Solomon chu tu hin a ram lalthrungphaah a thrung ta bok. 47 Lal khawnbawlhai chun Davida chu an hung lawmpui a, ‘I Pathienin i hming nêkin Solomon hming chu sukthra lem sien la, i lalthrungpha nêkin a lalthrungha chu ropui lemin siem raw se’ an ti a. Ei pu lal Davida khom a khumah kûnin Pathien a chawibiek a, 48 ‘LALPA, Israelhai Pathien, ka lalthrungphaa inthrung ding mi ka hmu phâk ngèia voisuna hung ruottu chu inpâkin um raw se’ a ti a nih” a ta.

49 Chu thu chu an hrietin Adonija mi fielhai po po chu an tri ta hle a, an tho a, an zăm dar ta vong a. 50 Adonija chun Solomon a tri leiin a tho a, maicham kî a va chel a. 51 Chun, lal Solomon kuomah, “Adonija chu a tri taluo a, ‘Lal Solomon chun a siehlaw hi kawlhnâma sukhlum lo dingin inkhâm meuin voisun hin thu tiem raw se’ tiin maichàm kî a chel el a nih” tiin an va hril a.

52 Solomon chun, “Mi ringum a nih ti a’n langtir phot chun a sam zai khat khom hnuoiah tla naw nih; amiruokchu, a suol ti hriet suok a ni ruok chun thìng a tih” a ta. 53 Solomon chun mi a tir a, maichàma inthokin an hung thruoi thlàk a, lal Solomon chu chibai a bûk a, Solomon chun, “I in tieng inlawi ta rawh” a ta.