Bethelah Jakob a kîr
35
1 Pathien chun Jakob kuomah, “Bethel chen hang fe la, chu taka chun umhmun khuor rawh. I u Esau kuoma inthoka i tlan siet laia i kuoma hung inlăr Pathien ta dingin maicham siem rawh” a ta.2 Jakob chun a sungkuohai le a kuoma um po po hai kuomah, “Hnam dang pathien in kolhai po po dehawn vong unla, insukthienghlim unla, in silfenhai thlâk ro. 3 Chun, Bethel chen hang fe’ng ei ta, ka lungzing nia mi dontu le ka fèna taphota mi umpuitu Pathien ta dingin maicham siem ka tih” a ta. 4 Ram dang pathien lim an kol po po le an nabèhai chu Jakob kuomah an hung chawi a, ama chun Sekema thingsaisuo bula chun a phŭm a. 5 Chuongchun an fe suok a, an sè vèla khuo po po chunga chun Pathienin thlabârna hri a’n lèngtir leiin tu khomin anni chu an hnot zui ngam nawh.
6 Jakob le a kuoma umhai po po chun Bethel chu an tlung a, 7 chu taka chun maichàm a siem a; a u Esau kuoma inthoka a tlàn siet laia a kuoma Pathien a hung inpuongna hmun a ni leiin chu hmun hminga chun El Bethela a’n bŭk a.
8 Chu hmuna chun Rebek dontu Debora chu a thi a, Bethela saisaw thing hnuoia chun an phŭm a, a hmun hmingah Alon Bakutchb an inbŭk a.
9 Padan Arama inthoka Jakob a hung kìr hin a kuomah Pathien a’n làr nawk a, mal a sawm a. 10 A kuomah, “I hming Jakob a ni-a chu Jakob ti ta loin Israel ti lem ta’ng an ti che” a ta, chuongchun hmingah ‘Israel’ a hung put tah a nih. 11 Pathien chun a kuomah, “Kei hi Iengkimthawthei Pathienc chu ka nih. Suon tieng hmûingilin i thlahai hung pung raw hai se. Hnampui le hnam chi hrang hrang i thrălbea inthokin hung suok an ta, lalhai khom hung suok bok an tih. 12 Abraham le Isak kuoma ka pĕk ram chu nang khom ka pêk che a, hi ram hi i thlahai kuoma khom pe’ng ka tih” a ta.
13 A biekna hmuna inthok chun Pathien chu a kai tung a. 14 Chu hmuna chun Jakobin lung a phun a, lunga chun dawn thilhlan uoin a buok a, sahriek a’n far khum bok a. 15 Pathienin a hung biekna hmun chu Jakobin ‘Bethel’ a’n bŭk a.
Rachel le Isak thi thu
16 Bethela inthok chun hmun dang an zuon pei a. Efrat an tlung hma hla feah Rachel chun nau hase a’n voi a, a na inrim hle a. 17 Harsa taka san a pek lai chun a nau domtuin, “Lungngai dĕr naw rawh, naupa i nei nawk a ni hih” a ta. 18 A thlarau a’n thla hma, a hrang chat lai chun a nau hmingah Ben Onid a sak a. A pa ruok chun Benjamine a sak ve thung a. 19 Rachel chu a thi a, Efrat panna lam sǐra chun an phŭm a (Efrat chu Bethlehem a nih). 20 A thlăn chunga chun Jakobin lung a phun a, voisun chen hin chu lungphun chu Rachel thlăn inchikna a nih.
21 Israel chu a fe pei a, Migdal Eder khĕlah puon in a kei a. 22 Hi hmuna Israel a um lai hin a hmei Bilha chu Reubenin a zălpui a, chu chu Israel khomin a hriet.
23 Jakob chun naupa sawmpahni a nei a, chuonghai chu: Lea naupahai chu Jakob nau lutir Reuben le Simeon, Levi, Juda, Isakar le Zebulun hai an nih. 24 Rachel naupahai chu Josefa le Benjamin an nih. 25 Rachel siehlawnu Bilha naupahai chu Dan le Naftali an nih. 26 Lea siehlawnu Zilpa naupahai chu Gad le Aser hai an nih. Hienghai hi Jakob naupahai, Padan Arama pienghai chu an nih.
27 Jakob chun a pa umna Kiriat Arba (Hebron an ti bok) bula um Mamre khuo, a pu Abraham le a pa Isak hai umna hmun chu a hung tlung a. 28 Isak chu kum za le sawmriet a upa a ni ta a. 29 Tar kûna dama a thlarau a’n thla chun a chipuihai kuomah thruoiin a um ve ta a, a nauhai Esau le Jakob chun an vŭi a.