2 Joh 1

2 JOHAN

Chibai bukna

1 Upa chun, Nuhmei inzaum, Pathien thlang le a nauhai, thutaka ka hmangaihai, keima chauh khom ni loin thutak hretu dang po po khoma an hmangaihai chu chibai ka bûk chĕu; 2 chu thutak, keinia chêng chu kumkhuoin kan kuomah um a tih. 3 Chu thutak le hmangainaa chun Pa Pathien le a Naupa Isu Krista kuoma inthoka lunginsietna dam, zangaina dam le inremna dam in kuomah um raw se.

Thutak le hmangaina

4 Pain thu a mi pĕk anga i nauhai threnkhatin thutaka kal an chawi ti ka hmu leiin ka lawm takzet a nih. 5 Nuhmei inzaum, thupêk thar ni loin a tira inthoka ei dong kha hril ding chèin ka ziek a nih; inhmangai tuo dingin ka ngèn chêu a nih. 6 A thupêk ang peia ei um hi hmangaina chu a nih; hi hi a thupêk, a tira inthoka in hriet kha a nih, ‘hmangainaah in um zing ding a nih’ ti hi. 7 Hlĕmtu tamtak, Isu Krista chu taksa putin a hung ti pom nawtuhai chu khawvelah an hung suok tah a, chuonghai chu hlĕmtu le Krista dodâltuhai an nih. 8 In inrimnahai thlăwn loa in thaw ra kim taka in hmu theina dingin, mani invêng thra ro. 9 Tu khom Krista zirtirna anga khawsa loa a zirtirna khĕla khawsatu chun Pathien a nei nawh. A zirtirna thua um zingtu chun Pa le Naupa a nei kop a nih. 10 Chu zirtirna fepui lo, in kuoma hung tu khom in inah intlungtir naw unla, trongbau thra khomin inthla naw ro. 11 Trongbau thraa betu chu a thil suol thawa chun a thrang vê a nih.

Inthlàna chibai

12 In kuomah thu tam tak hril ding nei lang khom lekha le lekhatuia ziek ka tum nawh; ei lawm a kim tlâng theina dingin in kuomah hung a, inhmatona inbiek ka beisei lem a nih. 13 Thlang laia mi ni vê, i zuorpuinu nauhaiin chibai an bŭk che.