Jerusalem tlawm thu
39
1 Jerusalem lak a ni dan chu hieng ang hi a nih: Judai lal Zedekia inlala inthoka kum kuona thla sawmnaaa chun Babulon lal Nebukadnezzar le a sipai po po chun Jerusalem an hung bei a, an inhuol a. 2 Zedekia inlal kum sawm le pakhatna, thla lina ni kuoa chun khawpui kul chu an sut tlang a. 3 Babulon lal hnuoia hotu Samgar mi Nergal Sarezer hai, an hotu lu tak Nebo-Sarsekim hai, lal mi rawn tak Nergal-Sarezer hai le hotu dang tam tak an hung lut a, kotkhar lailung taka chun umhmun an rem a. 4 Juda lal Zedekia le a sipaihaiin an hmu chun an tlanse a, zana chun lal huon tienga kul bang pahni inkara lama chun an inrel a, Arabia panna tieng chun an suok a. 5 Amiruokchu, Babulon sipaihai chun an hnot a, Jeriko phaizawlah Zedekia chu an hnot phak a, an man a, Babulon lal Nebukadnezzar kuomah Hamat ram Ribla khuoa chun an thruoi a, ama chun a chungthu chu a lo rĕl a. 6 Riblaa chun Zedekia hmu ngeiah a naupahai chu Babulon lal chun a that a, Juda mi thra tam tak a that bok a. 7 Chu zoah Zedekia mit chu a khel dokpek a, dâr kol a’n buntir a, Babulon tieng a thruoi a.8 Babulon mihai chun lal in le mi dang in po po chu an raw a, Jerusalem kul bang chu an sukchim vong a. 9 Lal vengtuhai kawmandar Nebuzaradan chun khawpuia mipui la umhai le a kuoma mania inpehai chu Babulon tieng salin a thruoi a. 10 A bâng la um sun, mi rethei ruol ieng khom nei lohai chu Judai ramah Nebuzaradan chun a maksan a, grep huon le lohai a pek tawl a.
Jeremia an insuo
11 Jeremia chungthua ruok chu Babulon lal Nebukadnezzar chun vêngtu kawmandar Nebuzaradan kuomah, 12 “Ama hi thruoi la, a chungah thra takin thaw la, sukna naw la, i kuoma a hril ang peiin thaw lem rawh” tiin thu a pêk a. 13 Vêngtu hotu Nebuzaradan chun an hotu tak Nebusazban hai, Nergal-Sarezer le Babulon lal hnuoia ofisar lienhai chu a ko khawm a, 14 Jeremia chu vengtuhai inkulna huong sunga inthok chun an ko suok a, Safana naupa Ahikam naupa Gedalia kuta chun a in tienga fepui dingin a’n koltir a, chuongchun ama mihai lai chun a khawsa ve nawk ta a.
Ebedmelek humin a um
15 Vengtuhai inkulna huong sunga Jeremia an khum lai chun a kuomah LALPA thu a hung tlung a: 16 “Ethiopia mi Ebedmelek kuomah Iengkim LALPA, Israel Pathien thu chu hieng hin hril rawh: ‘Ngai rawh, hi khawpui laka ka thuhai chu i mithmu ngeiah ka hlen trèp a, thratna ni loin sietna ka hung intlungtir ding a nih. 17 Chu ni chun nang ruok chu san suok ka ti che a, i mi trìhai kutah pek lut ni ve naw ti nih ti hi LALPA thu suok a nih. 18 Kei i mi ring leiin hum ka ti che a, kawlhnâma that ni naw ti ni a, i hringna san him ngei ka tih’ ti hi LALPA thu suok a nih’ tiin va hril rawh” a ta.