3 Joh 1

3 JOHAN

Chibai bûkna

1 Upa chun, dittak Gaia, thutaka ka hmangai chu, chibai ka bûk. 2 Ruol dit tak, iengkimah i hmuingil a, thlarau tieng le taksa tiengah i dam le hrisel theina dingin ka trongtraipek hlak che. 3 Unauhai an hung a, thutaka i ringumzie le i um tlatzie an mi hril a, ka lawm takzet a nih. 4 Thutaka ka nauhai an um ti ka hriet nêka lawmna nasa lem hrim ka nei nawh.

Gaia inpakna thu

5 Ruol dit tak, hieng unauhai hi mikhuol khom ni hai sien an chungah i lo thra ĕm êm a, 6 Kohran hmaa khom i thratzie an hril a. An inzin peinaah Pathien mihai thaw dan awm hrima anni hi i lo thrangpui thei chun thra hle’ng a tih. 7 Hming leia inthok suok an ni a, Jentelhai kuoma inthokin ieng khom an lak nuom nawh. 8 Chuongchun, thutak ta dinga thaw tlang ei ni ei hriet theina dingin hieng mihai hi ei thrangpui ding a nih.

Diotrefa le Demetri

9 Kohranhai kuoma khan lekhathon ka ziek tah a, nisienlakhom Diotrefa, anni laia hotu taka um thlâkhlàtu khan ka thu a poisa nawh. 10 Chuleiin, ka hung pha chu a chĕt dan, thil râpthlăk tak tak thawa a mi hril thang danhai chu hril vong ka ti chêu. Chu chauh khom chu ni loin, unauhai a lo lawm naw a, a lawm nuomhai khom a khap a, kohrana inthokin a hnotsuok tawl a nih.

11 Ruol dittak, a thra naw chu enton nuom naw la, a thra chu enton lem rawh. Thil thra thawtu chu Pathiena suok a na, thil thra naw thawtu chun Pathien a hmu ngai nawh. 12 Demetri hi mi tinin an inpăk a, thutaka khom inpâk a hlaw hrim a, keini khomin kan inpăk a, kan inpăkna chu a’n dik ti i hriet.

Inthlàna chibai

13 I kuomah thu tamtak hril ding ka neia chu lekha le lekhatuia ziek ka nuom nawh. 14 Hmu vak chè ka beisei a, inhmatonin ei la hril ding annawm. 15 Thlamuongna i kuomah um raw se. Hi taka ei ruolhai hin chibai an bŭk chè. Ei ruolhai kha an hming lam sengin chibai mi hung bûkpĕk rawh.