Hmar Baibul Apps hongnaa L. Keivom thucha

Kum 2004 khan Thuthlung Thar, Sam & Thuvar, 2007 khan Baibul pumpui Delhi Version chu a hung suok a. 2009 khan Sinleng neitu Lalchungsiem Thlawngate bengvarna le HSA Joint Headquarter, Bangalore thrahnemngaina zarin mobile-a inthoka tiem theiin a hung suok a, India rama a nei hmasa tak pakuona ei nih.

Kum 2015-a Revised Version a hung suok khan nasa taka siem phuisui a ni leiin a hran hlaka Bible Apps induong thar a ngai a. Sienkhom, harsatna hrang hrang leiin nuom angin a fe hrat naw el bakah trum khat lem chu kan chawlsan titi a. Iemani kong zawngin Lalpan lampui hung hongin, tu kut amanih hmangin a la hung sukpuitling ngei dingin ka ring tlat a.

Ni khat chu Lalremlien Neitham leh ram le hnam ta dinga rongbawl umzie, mihriem hmanga Pathienin a thu ruothai a sukpuitling dan kan hrilnaah, ei thaw po hi thawin a um a, ei thaw naw po hi thaw loin a um el a ni thu le ei chana tlu chu nghok inla nghok naw inla, hlen tuma bei ngat ngat a poimawzie le chu chu Pathien lawm tlak inhlanna a nizie thu ka hril a. Chu lei chu’m a ni ding, pŭt thar a thaw a, sawt naw te sungin a hung zo a. Voisun, kum 80 ka suona ding nia tlangzar theia a um hi vangnei kan ti takzet a nih. Boruok zai hmanga khawvel hmun tina um Hmar trong hmanghaiin hmaituoi hmanga Gospel thleng ei kil tlang theina a ni leiin a hlu a, ei hmang trangkai nuom a um takzet.

Delhi Version Baibul hi Pathien thu ringot inchukna ni loin, Hmar trong hmang dan indik inchukna dinga lekhabu um sun a ni leiin, ngun taka tiemtu tu khomin mani trong thiem phanain hmang ngei ngei a tih ti ka ring. Genesis-a inthoka Thupuong chenin sentence kim lo le indik lo kan hmu le hriethai chuh kan inthiel fai vong niin kan hriet a, tiem tlak le innghatna tlaka kan ngai a nih. Chuong chu a ni laiin, ieng Baibul version khom hi a thra famkim a um naw ang bokin, Delhi Version khom hi a thra famkim nawh. Thlarauin mi a pawl dan ang peiin, inril lema hmuhai chun an hmu dan anga inlet an hung nuom pei ding a na, ramri khang bur thei a ni nawh. Pathien inhriettirna hi ei mawl dan ang peiin ei hriet a, ei hril fie bok.

Delhi Hmar Christian Fellowship fe thlenga Baibul thu inlet le puongdar sin thawa um hi Pathien remruot a nih. Baibul inlet thrat sin tranna dinga Pathienin insaisangna dinga DHCF a lo buotsai le hmang pei dan dam hi thlaraua mit varna nei chun inhmai ruol a ni nawh. Delhi Version le inzoma thilthawna iengkima neitu nina DHCF-in nghet taka a chel hi Pathien bel ruota lo nizie puongtu a nih. Khawvel huopa rongbawlna nei zui pei dinga voisuna Bible Apps ei hong hi ei ring Pathien bân seizie a tak ngeia ei puongna a nih. Lalpan DHCF hi malsawmna tam lema vur peiin, a ropuina dingin hmang zuol pei raw se. Lalpa kuomah lawmthu hril ei tiu, ngil a nei kumkhuo si a.

(Delhi, July 14, 2019 Sunday)